LA CECEIDE
'MBOCAZIONI A LA MUSA
Chi penzi?[1] Tu dormi? Rivigghiati[2], o Musa,
cumpagna mia cara, cumpagna affettusa;
quand'era figghiolu[3] tu fusti cotrara[4],
cumpagna affettusa, cumpagna mia cara;
li notti e li jorni passava cu tia[5]
cumpagna affettusa di l'anima mia.
Jèu[6], quandu l'amaru mi stava dolusu[7],
calata[8] la testa penzusu penzusu
tu ti ndi venivi tirata [9]davanti
cu cosi puliti[10], cu chiàcchiari tanti
e prestu cacciavi la malancunia
chi tutta scornusa votava la via[11].
Ed oh! Quantu voti[12], lucendu la luna,
cu tia suli suli ndi ficimu ncuna![13]
Ciangimmu, lodammu, cantammu d'amuri,
tagghiammu pe' finca[14] lu caru Signuri;
cu tia, sempre suli, dicimmu cosazzi[15]
d'acchietti, di grupi, di capi di cazzi.[16]
Mo tutt'a 'na botta[17] nimica ti fai,
pecchì ti ndi fuji?[18] Pecchì ti ndi vai?
Ti chiamu, ti chiamu, mi sgargiu[19] gridandu.
Tu no' mi canusci? Su chiju di tandu!
Ma tu no' mi parri,[20] tu nenti mi dici,
pecchì no' rispundi? Chi cazzu ti fici?
L'arrisi[21] ti scappa, non hai malu cori,[22]
fa prestu, dicimu tri quattru paroli!
Lu sacciu[23] ca m'ami, ca sempri mi fai
'sti jochi,[24] ti cridi ca mi ndi scordai?
Ccà veni, ccà veni, lu sonu accordamu,
di Cecia[25] li verzi[26] cantamu, cantamu.
[1] Chi penzi?: Cosa pensi?
[2] Rivigghiati: Svegliati.
[3] Figghiolu: ragazzo.
[4] Cotrara: bambina.
[5] Passava cu tia: trascorrevo con te.
[6] Jèu: io.
[7] L'amaru mi stava dolusu: infelice me ne stavo addolorato.
[8] Calata: abbassata.
[9] Tu ti ndi venivi tirata: te ne venivi suadente.
[10] Cu cosi puliti: con argomenti piacevoli.
[11] Scornusa votava la via: scornata cambiava strada, andava via.
[12] Quantu voti : quante volte.
[13] Ndi ficimu ncuna!: ne abbiamo fatto qualcuna, belle cose!
[14] Tagghiammu pe' finca: parlammo male perfino.
[15] Dicimmu cosazzi: dicemmo grosse cose.
[16] D'acchietti, di grupi, di capi di cazzi: di ani, di buchi, di glandi.
[17] Mo tutt'a 'na botta: ora di colpo.
[18] Fuji?: scappi?
[19] Mi sgargiu: mi sgolo.
[20] Parri: parli.
[21] L'arrisi: il riso.
[22] Malu cori: rancore.
[23] Lu sacciu: Lo so.
[24] Jochi: giochi, scherzi.
[25] Cecia: diminutivo di Vincenza.
[26] Verzi: versi.